“ಇಲ್ಲಿದೆ ಜೀವನದ ಮಾನ-ಸ್ವಾಭಿಮಾನಗಳ ಮಹತ್ವ ಸಾರುವ ಆರು ಹನಿಗವಿತೆಗಳು. ಜೀವದ ಆತ್ಮಾಭಿಮಾನದ ಬೆಳಕತತ್ವ ಬೀರುವ ಭಾವಪ್ರಣತೆಗಳು. ಅವರಿವರ ಓಲೈಸುತ, ನಮ್ಮತನ ಮಾರಿಕೊಂಡು, ಬೆಲೆಯಿಲ್ಲದೆ ನೂರು ವರ್ಷ ಬದುಕುವುದಕಿಂತ, ನಮ್ಮದೇ ಜೀವ-ಜೀವನದ ಸ್ವಂತಿಕೆಯ ಮುದ್ರೆಯೊತ್ತುತ, ಆತ್ಮಾಭಿಮಾನ ಉಳಿಸಿಕೊಂಡು ನಾಲ್ಕುದಿನ ಬದುಕುವುದೇ ಶ್ರೇಷ್ಟ. ಆ ಬದುಕೇ ಉತ್ಕೃಷ್ಟ. ಏನಂತೀರಾ..?” – ಪ್ರೀತಿಯಿಂದಎ.ಎನ್.ರಮೇಶ್.ಗುಬ್ಬಿ.
1. ಸ್ವಂತಿಕೆ.!
ನಮ್ಮ ಬದುಕು
ನಮ್ಮದೇ ಆಗಿರಬೇಕೆಂದರೆ..
ನಾವು ನಾವಾಗಿರಬೇಕು.!
***************
2. ಲೇಸು-ಸಲೀಸು.!
ವೃಥಾ ದಾಕ್ಷಿಣ್ಯಕೆ ಬಸಿರಾಗುವುದಕಿಂತ
ಧಾರ್ಷ್ಟ್ಯದಿ ಬಂಜೆಯಾಗಿರುವುದು ಲೇಸು.!
ಅವಡುಗಚ್ಚಿ ನುಂಗುತ ನರಳುವುದಕಿಂತ
ಧೈರ್ಯದಿ ಕಕ್ಕಿ ನಿರಾಳರಾಗುವುದು ಸಲೀಸು.!
**********************
3. ಪ್ರಾರ್ಥನೆ.!
ಸದಾ ಬಾಗುವ ಶಿರಕ್ಕಿಂತ
ಬೀಗುವ ಕರನೀಡು ಶಿವ
ಕನಿಕರದಿ ಹರಸುವುದಕಿಂತ
ಹೆಮ್ಮೆಯಲಿ ಹಾರೈಸಲಿ ಭವ.!
*****************
4. ಶವಯಾನ.!
ಅಡವಿಟ್ಟು ಆತ್ಮಾಭಿಮಾನ
ಬದಿಗಿಟ್ಟು ಸ್ವಾಭಿಮಾನ
ಹರಾಜಿಗಿಟ್ಟು ಮಾನಾಭಿಮಾನ
ಬದುಕುವುದೆಂತಹ ಜೀವನ?
ನಿತ್ಯ ಜೀವಚ್ಚವ ಯಾನ.!
********************
5. ಕೃತ್ರಿಮತೆ.!
ಇಷ್ಟವಿಲ್ಲದಿದ್ದರೂ ಅರಳಿಸುತ ಮೊಗ
ಸುಮ್ಮನೆ ಬೀರಲಾರೆ ಬಲವಂತದ ನಗೆ.!
ಮಾತಾಡುವ ಮನಸಿಲ್ಲದಿದ್ದರೂ ಒಳಗೆ
ತೋರಲಾರೆ ಸಿಹಿ ಸವಿನುಡಿ ಹೂರಗೆ.!
********************
6. ದುರಂತ.!
ಕಂಡವರ ಕನಿಕರದ
ಕಂಬನಿಯಲ್ಲೆ ಸುಖಿಸುವವರಿಗೆ
ಎದುರಿನವರ ಅನುಕಂಪದ
ಅಲೆಯಲ್ಲೆ ತೇಲುವವರಿಗೆ
ರುಚಿಸದು ಬೆವರಿನ ಸೆಲೆ
ತಿಳಿಯದು ಸ್ವಾಭಿಮಾನದ ಬೆಲೆ.!
ಎ.ಎನ್.ರಮೇಶ್.ಗುಬ್ಬಿ.